Programa de incentivos á contratación por conta allea das persoas desempregadas paradas de longa duración

Por medio desta orde as empresas terán a posibilidade de obter axudas para a contratación indefinida inicial, para a contratación temporal cunha duración inicial de 12 meses e para a formación.

Prazo de presentación: As solicitudes de axudas polas contratacións por conta allea subvencionables realizadas entre o 16 de outubro de 2018 e o 20 de marzo de 2019 deberán presentarse ata o 20 de maio de 2019. As axudas previstas polas contratacións subvencionables realizadas desde o 21 de marzo de 2019 deberán solicitarse ata o último día do segundo mes seguinte á data en que se inicie a relación laboral indefinida ou temporal pola que se solicita subvención. O prazo para a presentación das solicitudes de axudas rematará o 30 de setembro de 2019, aínda que nesa data non transcorrese o prazo sinalado. As axudas son en réxime de concorrencia non competitiva.

As solicitudes deberán presentarse por vía electrónica.

a)    Bono de contratación, por medio do cal se proporcionará unha subvención para a contratación indefinida inicial e a temporal cunha duración mínima inicial de doce meses das persoas desempregadas de longa duración.

Deberá ser a tempo completo.

Incentivaranse cunha axuda de 10.000 euros por cada persoa desempregada parada de longa duración contratada.

As contratacións temporais cunha duración mínima inicial de doce meses realizadas ao abeiro desta orde de convocatoria incentivaranse cunha axuda de 5.000 euros por cada persoa desempregada.

As contías incrementaranse nun 25 % nos seguintes casos, que son acumulables entre si:

– Se a persoa desempregada parada de longa duración contratada é maior de 45 anos.

– No caso de que o centro de traballo (ou domicilio fiscal, no caso de carecer deste) estea situado nun concello rural.

– Se a persoa traballadora contratada é unha persoa emigrante retornada.

– Se é unha persoa trans.

–Se é unha empresa con mais de 50 persoas traballadoras e cunha taxa de estabilidade igual ou superior ao 70 %.

– Se a actividade da entidade solicitante pertence ao ámbito de sectores estratéxicos.

b)    Bono de formación para o financiamento de accións formativas relacionadas co posto de traballo

A persoa traballadora que recibe a formación e titorización ten que ser a mesma que participa no programa de bonos de contratación e, polo tanto, cumprir os mesmos requisitos que se establecen para participar no capítulo II.

En canto a duración da acción formativa será dun mínimo de 70 horas no caso dos contratos indefinidos iniciais e dunha duración mínima de 50 horas no caso dos contratos temporais, de formación teórica en contidos relacionados co posto de traballo a que asista integramente a persoa traballadora que participa neste programa.

Máis información:
https://www.xunta.gal/dog/Publicados/2019/20190320/AnuncioG0424-060319-0002_gl.pdf